قال له يابنى: إيه الحكايه
انتوا عملتم فيها إيه
احنا سايبينهالكو حلوه
لجل ما تخلوها أحلى
لكن اللى شايفه
إنها ما بقتش أحلى
ماكانش فيها الفقر ده
ولا الغنى والفجر ده
إنتوا عملتوا فيها إيه ؟
قال له صدقنى يا جدى
احنا ما عملناش فيها حاجه
احنا اتعمل فينا وفيها حاجات كتير
م الديابه إللى خلوا الدنيا غابه
الكبير ياكل الصغير
والغنى يمص دم الفقير
قال له يابنى .. كنت فاكر
إنى ســــايبكوا فى أمان
وتعيشوا أحسن من زمان
أنا وانا جايلك من مكانى
شفت ناس كانوا فى العلالى
العلالى بتاع زمان
وجنبهم كان ناس غلابه
وكلهم كانوا مستورين
ومبسوطين
النهارده شفتهم
كلهم بقوا مهمومين ومكدودين
ولا عادوا أبدا مستورين
وشفت ناس بقوا فى العلالى
وهما كانوا فى الحضيض
كانوا قاعدين ع الرصيف
قال له والله يا جدى ..
ما سابوش حتى الرصيف
لسه عايش جوا منهم
مستخسرينه فى الغلابه
اللى خلوهم غلابه
لما نهبوا كل حاجه
وخلوا كل واحد منا ماشى
شايل جوه منه ميت
قال له يابنى ..
أصل دول ما بيشبعوش
اللى طالع م الحضيض
يفضل فقير مهما إغتنى
وعمرعينه ما تتملى
حتى الوجوه ..
اللى كانت طيبه
مابقتش أبدا طيبه
الشراسه بتطل منها
بدون سبب
انا صحيت على خبط فوقى
قلت خيـــــــر..
الولاد فاكرينى لسه
مانسيونيش
جايين يزينوالى قبرى
ويبنوا لى فوق منه قبـه
بصيت لقيت وجوه غريبه
جايين بهمه يهدوا قبرى
أنا وجيرانى حسين و صبرى
عشان مايبنوا بداله كوبرى
وأراجوز و قهوه للعيال
دنياكوا دى ما بقتش حلوه
الآخره اللى أنا جى منها
أحسن كتير من أمها
شد الكفن يابنى عليا
خلينى أروح مطرح ماجيت
د. خيرى شاكرحمدالله
