د. خيري شاكر حمدالله يكتب: آه يا بنت الإيه

آه يا بنت الإيــه ..

آه يابنت الإيــه بحبك

رغم اللى بشوفه فيكى

ورغم اللى بشوفه منك

برضه أفضل أقول بحبك

أعمل ايه..

علمونى من زمان

انى أحبك

وانشغل دايما بحبك

وانت حبك حب تانى

حب غير حب الأغاني

حب يشقى

حب ما بيسعدش صاحبه

زي أي حب تاني

وفي يوم غضبت منك

وغصب عنى بعدت عنك

ألقى حبك يصحى جوا قلبي تاني

يمسح الدمع في عينيه

ويصالحني عليكي تاني

ارجع احلم من جديد

انى أرجعلك وألقى

القى فيك يوم جديد

يوم منور مش ضلام

يوم مافيهش قسوة مره

من ولادك ..

اللى هما مش ولادك

ما اللى بيهينوا ولادك

واللى بيذلوا ولادك

واللى نهبوا مال ولادك

واللى سرقوا البسمة منهم

لما خنقوا حلمهم ..

دولا أبدا مش ولادك

دولا أولاد الحرام ِ

دولا أولاد الحرام